சில்வண்டு..

தெருவோரம் நடக்க
என்றோ அத்தெருவில் இருந்த என்
பள்ளி காவல் நிலையமாயும்
பத்து பைசாவிற்கு தேன்மிட்டாயும்,
கம்பர்கட்டும், கிழங்கும் தந்த
பாட்டி கடை ,எவ்வளவு கொண்டு
நுழைந்தாலும் பத்தாதோவென
பதறவைக்கும், பல்பொருள் அங்காடியாக
உள்விளையாட்டு ஆடும் சிறுவர்கள்
போலியாய் திரையை
துரத்திக்கொண்டிருக்க..
பட்டமும்,கோலிக்குண்டும்,பம்பரமும்
நொண்டியும்,மேடு பள்ளமும் உப்புக்கரமும்
கொலகொலயா முந்திரிக்காயும்
ஒளிஞ்சு ஆடும் ஆட்டமும்
ஒரு கொடம் தண்ணியூத்தி ஒரு பூ பூத்ததும்
கனவின் பிம்பங்களாக

பண்டம் பாத்திரம் நிலம் நீச்சி
கலாச்சாரம் கற்பு இத்தியாதிகளும்
வந்தெனையடைய
தொலைத்ததெல்லாம்தேடி
தொலைந்து போகும்
மனம்...